ЭККО-ФАРМ төслийн хүрээнд 2025 оны 8 дугаар сарын 21, 22-нд Сүхбаатар аймагт “Малын эмч нарт зориулсан сургалт”-ыг “Эрүүл мал Эрсдэлгүй амьдрал” ТББ-тай хамтран зохион байгуулсан билээ.
Тус сургалтанд хамрагдсан Сүхбаатар аймгийн Мал эмнэлгийн газар (МЭГ)-ын эмч нар Баруун-Урт сумын 6 сүүний фермийн эздэд бруцеллёз өвчний талаар мэдээлэл өгч, цусны шинжилгээ, роз бенгалын урвал тавьж, үр дүн болон мэдээ, тайлан танилцуулжээ.
Сургалтыг аймгийн МЭГ-ын дарга М.Молорчимэг болон Эрүүл мэндийн албаны дарга Ж.Сундуй нар дэмжин нээлт хийж, мэдээлэл өгчээ.
Сургалтын товч агуулга:
Бруцеллёз өвчин, бруцеллёз өвчний халдвар хэрхэн дамждаг, лабораторид ямар шинжилгээ хийгддэг талаар
Сүүний цагирган урвал (СЦУ) хэрхэн хийгддэг талаар
Фермийн эзэд өөр аймгаас хээлтэгч мал авахдаа заавал тухайн газрын лабораторийн бичигтэй үнээ авдаг байх, түүний ач холбогдол
Саальчдыг эрүүл мэндийн, ялангуяа бруцеллёзын шинжилгээнд хамруулдаг байх
Энэ сургалт мэдээлэлд хамрагдсан 6 сүүний ферм нь Сүхбаатар Хөгжил үйлдвэр технологийн паркад сүүгээ нийлүүлдэг бөгөөд тус үйлдвэр технологийн парк нь сургуулийн хүүхдүүдийн “Сүү” хөтөлбөрийг хариуцдаг юм байна. Эдгээр фермүүдийн дунд өвчний талаарх мэдлэг, био-аюулгүй байдлын дадлыг бэхжүүлэх нь орон нутагт үйлдвэрлэсэн сүүний аюулгүй байдал, чанарыг сайжруулахад чухал хувь нэмэр оруулах юм.
Төслийн хамтын ажиллагааны хүрээнд хамтран ажиллаж буй Сүхбаатар аймгийн МЭГ-ын малын эмч нартаа цаашдын ажилд нь өндөр амжилт хүсье.
Mongolian 
English